ازاي تعمل الـ CV بشكل إحترافي ؟

 

  أهلا وسهلا بكل متابعين مدونة وظائف بلدنا 

زي ما اتكلمت عن اهمية السيرة الذاتية بشكل مبسط للقبول في الوظيفة, دلوقتي هانعرف ايه اهم ما تحتويه السيرة الذاتية لكل شخص بيقدم علي وظيفة مهما كان تخصصه 

ازاي تكتب السيرة الذاتية بشكل احترافي ؟

كلنا عاوزين  نعمل سيرة ذاتية احترافية خاصة بينا ومتميزة ، ولكن قبل توضيح  كيف تقوم بكتابة السيرة الذاتية الخاصة بك واللي  من خلالها تسنطيع الالتحاق بوظيفة لازم تعرف أن السيرة الذاتية زي جواز السفر للنجاح فعلا في اقتناص الوظيفة المناسبة ليك وهي مش مجرد معلومات تكتبها بطريقة عشوائية دون ترتيب.
 ولكن لابد من اتباع الأسلوب المناسب والصحيح  حتي تستطيع أن تجذب أصحاب الاعمال والوظائف والمعلنين عنها  إليك.
من خلال التدوينة دي سوف أقدم لك أفضل طريقة لكتابة السيرة الذاتية الخاصة بك مع أهم النصائح التي يجب أن تتبعها للحصول على " CV "  يؤهلك للالتحاق بالوظيفة التي ترغب بها.

هانعرف من خلال مدونة وظائف بلدنا الآتي :

–    ما هي السيرة الذاتية؟

–    ايه المعلومات اللي لازم تكون موجودة في الـ CV ؟

–   نصائح مهمة جداً عند إعدادك لسيرتك الذاتية.

أولا: السيرة الذاتية:

 السيرة الذاتية معناها قيام الشخص بعرض ملخص شامل عن حياته ودراسته ومجال الاعمال والخبرة،حيث أنها تعتبر أهم وثيقة من خلالها تقدرتسوق نفسك وقدراتك ومؤهلاتك وخبراتك لأصحاب الاعمال في شكل منظم بطريقة توضح مميزاتك اللي تشجعهم يختاروك من بين الكثيرمن المتقدمين للوظيفة.

ثانيا: ايه المعلومات اللي لازم تكون موجودة في الـ CV ؟

1- بياناتك الشخصية : من الضروري جداً في الـ CV وجود إسمك وتاريخ ميلادك ومحل اقامتك بجانب وسائل الاتصال الخاصة بك زي رقم المحمول والبريد الإلكتروني وصفحتك علي موقع لينكد إن ان وجد.

2- التعليم والمؤهلات : مؤهلك الدراسي وجميع الشهادات الدراسية التي حصلت عليها من وقت تخرجك بجانب مجال تخصصك ويكون ترتيب المؤهلات من الأحدث إلى الأقدم.

3–  خبراتك السابقة في العمل : لازم توضح خبرتك بأي عمل اشتغلت فيه سابقا ولكن المهم أنك تكتب الخبرات دي  بطريقة محترفة وبلاش تكتب الحاجات  الروتينية المحفوظة لكل واحد فينا زي الالتزام والمحافظة على النظام.
 حاول تضيف حاجة جديدة في وصفك لنفسك خلال فترة وجودك في شغلك السابق بأنك مثلاً دقيق في أعمالك وقادر على حل المشكلات اللي ممكن تواجهك في شغلك وعندك القدرة الكافية على التفاوض والإقناع بالشكل اللي يضمن النجاح والتميز للمكان اللي انت شغال فيه، واكتب كمان في الـ CV  كل الشغل اللي اشتغلت فيه حتي لو كان بعيد عن مجالك  والخبرة التي اخدتها من كل عمل عشان ده هايفرق معاك اكيد.

4- الهوايات والاهتمامات وانجازاتك:

–   خلي بالك ان الجزء ده لازم يكون مختصر علي قد ما تقدر.

–    بلاش هواياتك السلبية اللي بتضيع الوقت فيها زي متابعة المسلسلات والتليفزيون لوقت طويل لازم تختار الحاجة اللي تظهرك انك انسان عملي وبلاش تكتب اي حاجة وخلاص يعني خليك حريص.

–   استغل كل مواهبك وإمكانياتك في شكل مهارات واهتمامات عشان تضيف ليك في المجال اللي عايز تدخله.

–   لما تذكرهواياتك الغير عادية زي صعود الجبال أوغيرها من الحاجات الصعبة اللي توصل عنك انطباع عنك بأنك ذو كفاءة ومقدرة كبيرة ويمكنك الاعتماد على نفسك وتحمل المسؤولية دي بتزود من فرصك للحصول على الوظيفة.

–   أي مهارات أو إمكانيات عندك مرتبطة بالوظيفة لازم توضحها وياريت لو معاك نموذج منها يرفق مع الـ CV.

5-  المهارات: لازم توضح كل المهارات اللي عندك:

–  مهارة اللغة :من الضروري توضيح اللغة الأم او اللغة الاصلية عندك وبعد كده توضح ايه اللغات التانية اللي بتعرفها او تتقنها كويس مع كتابة درجة الاتقان للغات الاخري.

–  مهارات استخدام الحاسب الآلي:  العالم اعتمد بشكل كبير علي التكنولوجيا وكل الشركات ابتدت تحدث من انظمة الادارة بداخلها وعشان كده لازم توضح لأصحاب العمل مدي قدرتك وإمكانياتك على استخدام الحاسب الآلي.
واذا كنت اشتغلت علي برامج معينة قبل كدة وانت شايف انك تجيد استخدامها  اكتبها وماتنساش الدورات التدريبية والكورسات اللي حصلت عليها وقدرتك على تصفح الانترنت.

6- المراجع: الأكيد طبعاً  أن أي مكان عايز تشتغل فيه بيطلب منك تقدم الأوراق والشهادات التي تثبت صدق البيانات اللي في السيرة الذاتية الخاصة بك  ممكن يطلب منك شهادة بعض الأشخاص اللي اشتغلت معاهم قبل كده زي مديرك السابق ، عشان كده لازم  تكتب في جزء المراجع بالـ CV  (المراجع متوفرة عند الطلب).

ثالثا: نصائح مهمة جداً عند إعدادك لسيرتك الذاتية.

1-  الدقة والأمانة في كتابة البيانات الشخصية: لازم يكون اسمك وسنك وعنوانك ووسائل التواصل معاك صحيحة.
 وبلاش مبالغة في نقطة المهارات عندك أو خبرات وهمية لأن ده مش ممكن يساعدك في اقتناص الوظيفة بل بالعكس ده هايكون السبب انك تخسرها.

2-  شكل وتنسيق الــ  CV : شكل وترتيب ورقة السيرة الذاتية حاجة مهمة للغاية ولابد أن تكون طباعتها كويسة وتستخدم ورقة بمقاس A4 وتعمل تخطيط للصفحة من الحدود بشكل أنيق.

3- بلاش تزود صفحاتك بالسيرة الذاتية عن صفحتين: الـ CV مش كتاب انت بتكتبه وإنما انت بتعرض نفسك بشكل مختصر وسريع وبتوضح أهم نقاط القوة فيك عشان تكون جدير بالوظيفة وعشان كده حاول ماتزودش عن صفحتين.

4-  اعرف كويس ايه متطلبات الوظيفة: حاول تظهر كل امكانياتك ومهاراتك بشكل يلفت النظر.

5-  خليك مبدع في تصميم الـ CV:  كل وظيفة عايزة مهارات وخبرات مختلفة يعني لازم تكون عارف كويس كل وظيفة محتاجه ايه منك عشان تقدر تنافس علي الوظيفة دي.

6- حاول تسوق نفسك بطريقة مختصرة للغاية :  في اخر الـ CV  هاتكتب ليه أنت أفضل واحد والأجدر عشان تاخد الوظيفة دي.

7- بلاش تحط بإيدك ثغرات في الـ CV :   يعني مثلاً تكتب انك كنت شغال في اكتر من مكان في نفس الوقت لاني اعتقد كده مفيش حد ممكن يصدقك  … خليك واقعي اكتر عشان محدش يشكك في مصداقيتك وتضيع علي نفسك الفرصة.

8- اهتم باللغة اللي هاتستخدمها في كتابة الـ CV :   بمعني اوضح .. الاخطاء الإملائية أو اللغوية سواء كانت باللغة العربية أو بالإنجليزية وخليك حريص ان الـ CV مفيش فيه اي اخطاء .

9-   إعمل  تحديث دايماً للـ CV  الخاص بك : زي تصحيح السن طبعاً وإضافة أي تحديثات سواء في الشهادات الإضافية  والكورسات التي تحصل عليها أو الخبرات في العمل….. إلخ.

وخليك متأكد أن الـ CV اذا كان بشكل احترافي ده بيسهل عليك حاجات كتير بعد كده ومن الـ CV بناخد الانطباع الاول عن الشخص ودي بتكون الخطوة الاولي لحصولك على الوظيفة اللي انت عايزها.